ياكلوا بسكويت ... كلاكيت تاني مرة

مش عقبال أملتكوا المذيع اللامع حل مشكلة العيش .... آه العيش ... العيش اللي بيتاكل ده

و ايه يا خويا بمنتهى البثاطة .... ( ما أنا كاتباها ث مش س تضامنا مع الاطفال الابرياء اللي هايلاقوا عيش ياكلوه ابتداءا من اليوم اللي حل فيه المذيع المشكلة )

بدل الوقفة في الطوابير و البهدلة و العيش أبو خمسين قرش الرغيف ده ( موجود صدقوني ) نعمل ايه .. نعمل العيش في البيت ... ارخص و أوفر ...

سيبكوا من انكوا مش هاتعرفوا تشتروا الدقيق و ان الدقيق اللي هانحتاجه بالشيء الفلاني الكيلو و كل الحواديت دي .. اسمعوا بقى اللي موتني

االمذيع الكبير جي بيسأل الشيف نجيب الردة منين .. ما ههو الشيء لزوم الشيء يا جماعة ... هايجيب منين الردة لزوم العيش البلدي ( اللي

ما كانوش عارفين يفردوه ده .. رحم الله أيام المطرحة )

طلعت الردة بتتجاب منين .... من السوبر ماركت ... تا تاتا تا ... يا فرحتي ...

و تاني ماري انطوانيت .. قال ياللي مش لاقين العيش تاكلوه .. هاتوا الردة من السوبر ماركت ... و عجبي

على رأي ماري انطوانيت

أحد المعارف المختلفين عني جملة و تفصيلا .. أثناء نقاش حول أسعار الشاليهات بالمشروعات الجديدة على الساحل ... طرحت فكرة انه سيأتي اليوم الذي ستكون شواطئ بلادنا ملكا فيه لعدد محدود من الافراد و لن يجد أفراد الطبقة الدنيا أو حتى المتوسطة متنفسا لهم ... على الشاطئ .. اجابني بمنتهى البساطة .. ساعتها هايسكنوا الفنادق ...

الفنادق ... !!!! و ماله

على رأي ماري انطوانيت .. الناس مش لاقية العيش .. ياكلوا بسكويت ...

و عجبي

دخلت على المدونة بتاعتي النهاردة و مستنية أشوف مشاركة جديدة فيها ...
ياه .. دي طلعت بتاعتي .. يعني لازم أنا اللي أحط المشاركة .. تصوروا